{
  "1": "Ei ru phat dôih, no di ŏh mi tlĕh nai phat dôih. ",
  "2": "Bơ yơng mŏng pơp ŏh mi phat dôih, ŏh mi jrăng tŭ pơp phat dôih ya, jêh iên ŏk dư̆t ŏh mi sŏng ta nai, ăt nai sŏng ta ŏh mi klăh iên ya. ",
  "3": "Pơp mhŏ dơi ŏh mi so ndrêh mŏng măt nêh kiêu ma ŏh mi di, ƀê̆ dăh so dơi ŏh mi so jhi ndrơng mŏng măt tơm? ",
  "4": "Mdăh đa lăh năñ ŏh mi ngơi ta kiêu ma ŏh mi di; 'Lơi ăñ sŏk ndrêh băh măt me, ƀê̆ dăh tŏ hư̆n, mŏng măt ŏh mi mau jhi ndrơng? ",
  "5": "Wơ băl pra mhŏ găl! Luôr hĭn, ăn sŏk ndrăn jhi ndrơng băh măt tơm, hư̆n kăh ŏh mi jrăng so klă no di dơi sŏk ndrêh băh măt nêh kiêu ma ŏh mi di. ",
  "6": "Ei ru ŏh mi ăn pơp ƀrăh ngôr ta sau, jêh iên ei ru ŏh mi čĕ mai yuôm ta măt pôl sư̆r, ơn ĕh juôt li pơp hư̆n mŏng jŏng ĕh, jêh iên ĕh lŏ wiêng kăp săk  tơm.",
  "7": "Ăn dăn, jêh iên nai jrăng ăn ta ŏh mi pơp hư̆n. Ăn juôi, jêh iên ŏh mi jrăng so. Ăn khŏk, jêh iên ƀăng jrăng pŏk ta ŏh mi.",
  "8": "Bơ yơng nêh tơm dăn jrăng mau, nêh tơm juôi jrăng so jêh iên, nêh tơm khŏk ƀăng jrăng pŏk. ",
  "9": "Mdăh mau nêh mŏng ŏh mi, ndă kuôn  kăn dăn ƀăñ ƀê̆ dăh kăn ăn klŏ mau ta ĕh ya?",
  "10": "Mdăh kuôn lŏ dăn ka ƀê̆ dăh kăn ăn bêh ta ĕh?",
  "11": "Kơt iên, ndă ŏh mi jêng nêh djŏh, ăt ŏh mi gư̆t ăn pơp găl ta kuôn ya, ƀăh jai Bap ŏh mi gŭk tŏng trôk, so ăn pơp găl hĭn ta nêh tơm dăn Khua Yang lăh?",
  "12": "Kơt iên, mŏng grăp bruă, ndă di pơp ŏh mi khơñ nai mhŏ ta ŏh mi, ăn ŏh mi mhŏ pơp hư̆n ta nai ya, bơ yơng hư̆n jêng pơp bhiên jêh iên pơp têh luôr. ",
  "13": "Ăn mư̆t băh ƀăng hăt. Bơ yơng ƀăng lơ jêh iên truông ram ĕh lăm ndơp tŭk rai lêk, jêh iên nêh mư̆t mŏng iên ăt ŏk ya.",
  "14": "Bơ yơng ƀăng hăt jêh iên truông kuôn nê̆ ĕh lăm ndơp trôh ta pơp brêh, jêh iên ƀê̆ nêh gu dơi so ĕh. \n\n",
  "15": "Ăn răng yơng ta băl têh luôr huôk, hư̆n jêng băl sŏh tau biêp sak ta ŏh mi, ƀê̆ dăh mŏng nuông tŏ, băl ĕh jêng pôl sau rhau he sa. ",
  "16": "Ŏh mi jrăng gư̆t năl hên mơn băh ple hên di. So mau nêh lêh ple ño băh tơm luôk, mdăh plei a ra băh tơm sei to?",
  "17": "Iên ya, grăp jhi găl mau ple găl gu, bơ jhi djŏh mau  ple djŏh.",
  "18": "Jhi găl so dơi mau ple djŏh ôh, jhi djŏh ăt so dơi mau ple găl ya.",
  "19": "Đơ tơm jhi so mau ple găl nai jrăng kăl lat jêh iên čĕ mŏng iñ.",
  "20": "Kơt iên, ŏh mi jrăng gư̆t năl hên mơn băh ple hên di.",
  "21": "So mau lĕ mơt nêh tơm ngơi ta ăñ: 'Wơ Khua Yang, wơ Khua Yang' jrăng dơi mư̆t mŏng uôn Yang Trôk, ƀê̆ dăh čuôm gu nêh tơm mhŏ hui si pơp khơñ Bap ăñ gŭk tŏng trôk.",
  "22": "Mŏng nar hư̆n, ŏk nêh jrăng ngơi ta ăñ: 'Wơ Khua Yang, wơ Khua Yang, so lăh hi sŏk Năn Yang ngơi pơp têh luôr, sŏk Năn Yang prŏh yang djŏh jêh iên sŏk Năn Yang mhŏ ŏk bruă myang lăh?",
  "23": "Jêh iên mông hư̆n, ăñ jrăng têh nư̆k ta hên klăh iêu: 'So tuôm ăñ gư̆t năl pu me! Wơ băl mhŏ ƀai, ăn du wăč băh ăñ.'",
  "24": "Kơt iên, lĕ mơt nêh, hư̆n jêng nêh tơm iêt djăp pơp ăñ ngơi ho jêh iên mhŏ hui ĕh jrăng ndrơm klăh di ju nau nêh gư̆t mĭn kăn lăm ndŏk hih tŏng bôk mau ram.",
  "25": "Mih sak, dak ram trôh, čal pôh jêh iên tlă ta hih hư̆n, ƀê̆ dăh ĕh so dơi dlưh bơ yơng jêh lăm ndŏk tŏng bôk mau ram.",
  "26": "Jêh iên đơ nêh iêt pơp ăñ ngơi ho ƀê̆ dăh so mhŏ hui ĕh nêh hư̆n ndrơm klăh di nêh plư̆p, kăn lăm ndŏk hih kăn tŏng tač kiêk. ",
  "27": "Mih sak, dak ram trôh, čal pôh jêh iên tlă ta hih hư̆n, ĕh jrăng bông mŏng sô̆ jêh iên pơp čăh rai hih hư̆n kjham ngăn.",
  "28": "Bruă hư̆n trôh jêh gu Yang Yêsu tơ-ti pơp hư̆n, pôl uôn lan dlăng ndrơh khĕ yơng băh pơp Khua Yang tơ ti,",
  "29": "Bơ yơng Khua Yang tơ-ti hên ndrơm nêh mau pơp myang, jêh iên so mau klăh di băl tơ-ti pơp bhiên hên di ôh."
}