{
  "1": "Mŏng nar hân, mtao Čư Hâo Hêrôt tŏng pĕh ta Yang Yêsu.",
  "2": "Mtao ngơi ta băl k'han kăn klăh iêu: \"Kăn hân jêng Yôhan ƀaptit băh tŭk khât dŏk brêh. Hân jêng lĕ pơp myang klăh iên mâo mŏng nêh hân.\"",
  "3": "\tBơ yơng mtao Hêrôt jêh ñâp Yôhan, čăp ta sei jêh iên nggruôn mŏng war yơng băh broă de Hêrôđia, ur kăn Philip ŏh kăn tơm.",
  "4": "\tYơng Yôhan jêh ngơi ta mtao klăh iêu: \"Mtao so dơi sai de u'ur hân.\"",
  "5": "Hêrôt khơñ lăm khât Yôhan, ƀê̆ dăh kăn bhŭng ta uôn lan, yơng hên dlăng Yôhan jêng nêh têh luôr.",
  "6": "\tɃê̆ dăh trôh mông kăh nar lai săk kăn Hêrôt, kuôn u'ur de Hêrôdia kdŏ muñ mŏng tŭk mar de lăm brơn nuih nhăm Hêrôt.",
  "7": "Hân yơh, mtao ƀuôn rư̆ng jrăng ăn ta de djăp mta pơp de dăn.",
  "8": "\tTa kơi pơp mei de t'tă čhôl, hân de dăn: \"Dăn ăn ta ăñ bôk kăn Yôhan ƀaptit ăn mŏng măm, ndơp ta o!\"",
  "9": "\tMtao bêng pơp rŭng răng, ƀê̆ dăh yơng bah pơp jêh kăn ƀuôn rư̆ng ƀăh ta măt năč mŏng mông sông sa mơh, hân ñjêng mtao yoa k'han mhŏ hui si pơp de dăn.",
  "10": "\tMtao yoa nêh ndăč bôk kăn Yôhan mŏng war.",
  "11": "\tJêh hân nai ăn bôk kăn Yôhan mŏng măm jêh iên ăn ta ti de, jêh iên de sak ndơp ta mei de.",
  "12": "Kơi hân, băl ƀing kna Yôhan di sak sŏk săk jăn jêh hân tăp bâl kăn. jêh hân hên sak têh ta Yang Yêsu.",
  "13": "\tJêh Yang Yêsu tŏng pơp hân, Khoa Yang hao plŭng du băh tŭk hân, sak trôh tŭk ñhuôt nêh gŭk ju nâo. Jăng jai uôn lan tŏng klăh iên, dŏng băh grăp uôn hên sak jŏng gre Khoa Yang.",
  "14": "\tJêh hân Yang Yêsu trôh jêh iên so uôn lan ŏk. Khoa Yang tŏng đač mŏng nuih nhăm, jêh iên lăm băh lĕ nêh kuôp ji mŏng hên.",
  "15": "\tTrôh mho, băl ƀing kna sak ngơi ta Khoa Yang: \"Ho jêng tŭk ñhuôt nêh jêh iên mông ăt jêh la ru. Dăn Khoa Yang ăn uôn lan du, no di hên dơi mât mŏng uôn jêh hân ruôt pơp sông sa ta hên.\"",
  "16": "\tɃê̆ dăh Yang Yêsu ngơi: \"Man ăn hên sak. Oh mi jrăng ăn hên sa.\"",
  "17": "\tHên ngơi ta Khoa Yang: \"Ta o hi so mâo pơp čuôm gu prăm mlăm ƀăñ jêh iên bar mlăm ka.\"",
  "18": "\tYang Yêsu ngơi: \"Ăn sak ndơp lĕ pơp sa hân trôh ta ăñ o.\"",
  "19": "\tJêh hân Yang Yêsu t'tă ta uôn lan gŭk mŏng sô̆ tač băt. Khoa Yang ñôt prăm mlăm ƀăñ jêh iên bar mlăm ka. Ngơk măt tŏng trôk, Khoa Yang lăh găl jêh iên phĭč ƀăñ ăn ta băl ƀing kna, jêh hân băl ƀing kna tŏng phă ta băl uôn lan.",
  "20": "\tLĕ mơt hên dơi sa jêh iên hơm g'gu. Jêh hân, hên dôñ lĕ mơt pơp hôm khăñ băh ƀăñ djăh rai, dơi mâo măt bar bai bêng.",
  "21": "\tLĕ mơt nêh sa năng ai prăm bâo nâo t'tlâo, ñăm ngơp băl u'ur wăt ku sei.",
  "22": "\tJêh hân, Yang Yêsu t'tă rŏk băl ƀing kna mât mŏng plŭng jêh iên sak luôr ta Khoa Yang gao hang đăh tŏ, jai mông Khoa Yang yoa uôn lan du.",
  "23": "\tJêh ăn uôn lan du hih, ju nâo Khoa Yang sak čơng yôk no di kuôl dăn. Trôh mông mho, Khoa Yang gŭk ju nâo ta iên.",
  "24": "\tɃê̆ dăh mông hân, plŭng jăng jai hôm mŏng mbar dak sĭ, dak yak drăm yơng c̆al dră măt.",
  "25": "Trôh ngăl tal puôn măng hân, Yang Yêsu sak jŏng ta bôk dak sĭ trôh ta hên.",
  "26": "\tJăng jai băl ƀing kna so nêh sak ta bôk dak sĭ, hên bhŭng tlŏh nŏh jêh iên ngơi: \"Čak tŏ hân,\" jêh hân ôr ta pơp đhir ngit.",
  "27": "\tɃê̆ dăh Yang Yêsu ngơi rŏk hên klăh iêu: \"Ăn nuih nhăm đap nang! Ăñ ho. Man bhŭng!\"",
  "28": "\tPêtrôs ngơi ta Khoa Yang klăh iêu: “Wơ Khoa Yang ndă nâ̆k jêng Khoa Yang, dăn ăn ta ăñ dơi sak tŏng bôk dak trôh ta Khoa Yang.\"",
  "29": "\tYang Yêsu ngơi: \"Ăn me sak. \"Hân yơh Pêtrôs djhoang băh plŭng sak tŏng bôk dak trôh ta Yang Yêsu.",
  "30": "Ƀê̆ dăh jăng jai Pêtrôs so čal ram, kăn bhŭng. Hân jai ĕh rŏng krăm mŏng dak, kăn ôr: \"Wơ Khoa Yang, lăm tlĕh ăñ!\"",
  "31": "\tYang Yêsu mhăč rŏk yơr ti, đŏh kăn Pêtrôs jêh iên ngơi: \"Nêh ƀê̆ pơp đăo, pơp mhŏ me đing?\"",
  "32": "\tJăng jai Yang Yêsu jêh iên Pêtrôs čơng mŏng plŭng, mông hân c̆al dât ya.",
  "33": "\tJêh hân băl ƀing kna mŏng plŭng n'nei ta Yang Yêsu, klăh iêu: \"Khoa Yang klă jêng Kuôn Yang Trôk.\"",
  "34": "\tJêh gao hang đăh tŏ, hên mdei plŭng ta hang Ghênêsarêt.",
  "35": "\tJăng jai uôn lan ta iên gât năl Yang Yêsu, hên tŏng têh grăp tŭk uôn jâm dar, jêh iên nai sak ndơp ta Khoa Yang ŏk nêh kuôp ji.",
  "36": "\tHên dăn Khoa Yang ăn gu hên dơi bi ta pât ao Khoa Yang, jêh iên lĕ mơt nêh dơi bi, ăt băh g'gu kuôp ji."
}