{
  "1": "\tYang Yêsu du băh hĭh ƀân jêh iên jăng jai sak mŏng nuông truông, băl ƀing kna trôh hên t'to ta Khoa Yang dlăng lĕ mơt pơp mŏng wăl hĭh ƀân.",
  "2": "\tɃê̆ dăh Khoa Yang ngơi ta hên: \"So pu me so djăp mta pơp hân lăh? Ăñ ngơi ngăn ta pu me, ngĭn ngăn yơh jrăng so hôm ju mlăm bôk mâo ho dơi hôm kơng ta bôk mâo tŏ no ĕh jrăng so dlưh mŏng sô̆.\"",
  "3": "\tJăng jai Khoa Yang gŭk tŏng yôk Ôliu, băl ƀing kna sak tŏng tuôm ju nâo Khoa Yang jêh iên lup: \"Dăn ăn ta hi gât năn năng lĕ mơt broă hân jrăng trôh? Pơp lăm năl luôr nar trôh Khoa Yang di jêh iên nar tôč dât đô̆ nă jrăng ñjêng?\"",
  "4": "\tYang Yêsu têh ta hên: \"Ăn ñjrăng no di so nai têk lăm pu me sak suô̆ truông.",
  "5": "\tBơ yơng ŏk nêh jrăng sŏk năn ăñ sak trôh. Hên jrăng ngơi: \"Ăñ jêng Yang Tŏng Tlĕh, jêh iên jrăng têk lăm ŏk nêh sak suô̆.",
  "6": "\tPu me jrăng tŏng pĕh băh pơp tăm mblăh jêh iên pơp têh ta pơp tăm mblăh. Ăn dlăng nâ̆k no di so rŭng răng, bơ yơng lĕ broă hân ĕh jrăng trôh, ƀê̆ dăh ñăm gĕh nar tôč dât ya.",
  "7": "\tBơ yơng uôn lan ho jrăng dŏk tăm dăng ta uôn lan dêh, čar ho jrăng tăm mblăh ta čar tŏ. Jrăng mâo pơp nguôt sap jêh iên nggăr tĕh ŏk tŭk.",
  "8": "\tɃê̆ dăh lĕ mơt broă hân čuôm gu c̆ŭ c̆am ta grăp pơp ji lai săk.",
  "9": "Mông hân nai jrăng lăm ndơp pu me mŏng tŭk knap mñai jêh iên lăm khât lat pu me. Lĕ mơt uôn lan jrăng hao nuih ta pu me bơ yơng năn ăñ.",
  "10": "\tJêh hân ŏk nêh ĕh jrăng păk bông, lhiăr ndăng tơm, hao nuih ndăng tơm.",
  "11": "\tŎk khoa tơm têh luôr mgưt jrăng dŏk têk lăm ŏk nêh sak suô̆ truông.",
  "12": "\tBơ yơng pơp so gưt pơp bhiên jrăng lar ŏk, pơp khăp mŏng kuôn nêh jrăng ñjêng ĭk.",
  "13": "\tɃê̆ dăh nêh tơm dơi gĭr tăl trôh tôč dât, nêh hân jrăng dơi tŏng tlĕh.",
  "14": "\tPơp Găl ho băh Uôn Yang Trôk jrăng dơi t'ti lăh grăp tŭk mŏng tĕh dih, no di têh sơm ta grăp uôn lan. Jêh hân pơp tôč dât jrăng trôh.",
  "15": "\tKơt iên, di lăh pu me so pơp bi mut lăm ndơp ta pơp rai lêč mŏng tŭk ƀrăh ngôr, jêng pơp nêh têh luôr Đaniên jêh ngơi ru, nêh tơm dlăng ăn wơng.",
  "16": "\tMông hân nêh tơm gŭk mŏng wăl Yuđê ăn tuôt du tŏng yôk,",
  "17": "\tnêh tơm gŭk tŏng dôn hĭh man jâr sŏk pơp du băh hĭh ôh,",
  "18": "jêh iên nêh tơm gŭk mŏng tač lŏ man du sŏk ao jhŭng kăn.",
  "19": "\tɃê̆ dăh mŏng lĕ nar hân, knap mñai ngăn yơh ta u'ur bân mdăh băl u'ur mâo kuôn hôm pu!",
  "20": "\tĂn kuôl dăn no di broă pu me du plăč hân so gĕh ta dơm ĭk, mdăh gĕh ta nar sa ƀat.",
  "21": "\tBơ yơng năng hân jrăng mâo pơp knap mñai ram, ñăm tuôm mâo dŏng băh mhei rĭh tĕh dih trôh nar o, jêh iên ăt jrăng so hôm wêh mâo ya.",
  "22": "\tNdă so nai lăm tơt lĕ mơt nar hân ăt so mâo ju mta pơp ĕh brêh dơi tlĕh. Ƀê̆ dăh bơ yơng băh nêh jêh săč, hân yơh lĕ mơt nar hân nai jrăng lăm hič hât.",
  "23": "\tMông hân, ndă mâo nêh ngơi ta pu me: \"Ăn dlăng ho, ho jêng Yang Tŏng Tlĕh!\" Mdăh \"Khoa Yang ta tŏ hân!\" Ei ru pu me tip.",
  "24": "\tBơ yơng băl krist djŏh jêh iên ju băk băl têh luôr djŏh jrăng trôh jêh iên nôh ƀlang pơp lăm năl, pơp myang ram no di ndă dơi ĕh jrăng têč lăm suô̆ wăt băl jêh săč roăh.\n\n",
  "25": "\tĂn ñjrăng hŏ! jêh ăñ têh luôr ta pu me ru hân.",
  "26": "\tHân yơh, ndă hên ngơi ta pu me: \"Tŏ hân, Khoa Yang jăng jai gŭk mŏng bri tač.\" Ei ru pu me sak ta iên. Mdăh, hên ngơi: \"Dlăng ho! Khoa Yang jăng jai gŭk mŏng nuông dŭ lăm.\" Ei ru pu me tĭp.",
  "27": "\tBơ yơng ndrơm klăh di ƀlĭp lơp đat băh đăh nar lôh jêh iên trôh ta đăh nar ñăp, ăt kơt iên ya pơp Kuôn Nêh jrăng jâr.",
  "28": "\tU ta tŭk mâo săk khât, ta iên grăt jrăng tăm ƀân.",
  "29": "\tɃê̆ dăh, pơp knap mñai ta lĕ nar hân mhei dât, nar jrăng ngo măng, khe so hôm đat ang, lĕ mơt măñ jrăng lăč băh trôk, jêh iên lĕ pơp myang tŏng trôk ĕh nggăr.",
  "30": "\tMông hân, pơp lăm năl ta Kuôn Nêh jrăng nôh ƀlang tŏng trôk, jêh iên lĕ mơt găp pôl nêh mŏng dôn tĕh jrăng ôr ñim. Hên jrăng so Kuôn Nêh trôh ta ñuôi tŭk mâo pơp myang jêh iên pơp guh ang ram..",
  "31": "\tKhoa Yang jrăng yoa băl myang Yang di ôh dơk kei ram, jêh iên hên jrăng tăm ƀân lĕ mơt nêh jêh săč băh puôn kêng trôk. Dŏng băh dât trôk ho trôh ta dât trôk tŏ.",
  "32": "\tĂn pu me riêm pơp riêm ho băh jhi ara. Jăng jai mbăh ĕh lŏng kuôt jêh iên čăt ha, mông hân pu me gât dơm bhang mơñ trôh.",
  "33": "\tKơt iên ya, jăng jai pu me so lĕ mơt pơp hân, ăn pu me gât klăh iêu, Kuôn Nêh mơñ trôh ru gŭk kăp ta ƀăng hih.",
  "34": "\tĂñ ngơi ngăn ta pu me, băl nŭk ho jrăng so gao tôč tăl trôh mông lĕ mơt broă hân jrăng trôh lĕ.",
  "35": "Trôk jêh iên tĕh jrăng gao lĕ, ƀê̆ dăh lĕ mơt pơp ăñ ngơi jrăng hôm hui hai.",
  "36": "\tBơ nar hân jêh iên mông hân so mâo nêh dơi gât, wăt ta băl myang tŏng trôk mdăh Kuôn ăt so gât ya, čuôm gu Bap dơi gât.",
  "37": "\tNdrơm nŭk kăn Nôê lak đô̆ nă, pơp wêh trôh Kuôn nêh di ăt jrăng klăh iên ya.",
  "38": "\tBơ yơng ndrơm ta luôr mŏng nar dak ngăp, nai sông sa, tăm sai tăl trôh nar Nôê mât mŏng plŭng,",
  "39": "\tjêh iên hên so gât ju mta pơp, tăl trôh mông dak ngăp pôh lĕ mơt hên. Pơp Kuôn Nêh jrăng trôh ăt klăh iên ya.",
  "40": "Mông hân, bar nâo nêh t'tlâo gŭk mŏng tač lŏ, ju nâo nai jrăng dơi sŏk, ju nâo nai jrăng ndrŏh lat.",
  "41": "\tBar nâo u'ur jăng jai pĕh ba, ju nâo nai jrăng sŏk, ju nâo nai jrăng ndrŏh lat.",
  "42": "\tHân yơh, ăn ñjrăng bơ yơng pu me so gât năn mông Khoa Yang pu me jrăng trôh.",
  "43": "\tɃê̆ dăh ăn gât klăh iêu, ndă di kăn tơm hĭh gât luôr năn mông nêh tlĕ trôh, kăn tơm hĭh ăt kăn ñjrăng jêh iên so dơi ăn băl tlĕ mât mŏng hĭh kăn.  ",
  "44": "\tHân yơh, ăn pu me ñjrăng luôr bơ yơng Kuôn Nêh jrăng trôh mong mông pu me so mĭn.",
  "45": "\tNêh tơm jêng dâk sĭt suôr jêh iên gât mĭn, dơi khoa jao broă năk iêl lĕ hĭh tâm no di bhă pơp sông sa ta grăp nâo nêh gĕh mông?",
  "46": "\tGăl jôn ta kăn dâk hân jăng jai kăn tơm hĭh gât kăn mhŏ klăh iên.",
  "47": "\tĂñ ngơi ngăn ta pu me, khoa jrăng jao ta kăn năk iêl lĕ mơt ngăn drăp kăn mâo.",
  "48": "Ƀê̆ dăh ndă kăn dâk ƀai hân kăn mĭn dêh mŏng nuih nhăm kăn: \"Khoa ăñ jrăng du la,\"",
  "49": "\tjêh iên kăn dưng pŭ băl dâk d'dêh mhŏ broă băk kăn jêh hân ñêt sa ju băk băl ñâl nơm,",
  "50": "\tkhoa kăn dâk hân jrăng trôh mŏng nar kăn so mĭn, mŏng mông kăn so gât.",
  "51": "\tKhoa jrăng pŭ yat kăn jêh iên kčăh tŭk ta kăn ju băk ta băl pra mhŏ găl, jêng tŭk jrăng mâo pơp ôr ñim jêh iên kriêt sêk."
}