mnong_2020_mng_mlt_mat_book/mat/6.json

{
  "1": "Ăn dlăng nư̆k no di oh mi so mhŏ bruă găl ŏh mi ta măt kuôn nêh ăn nai dơi so. Ndă kơt iên, ŏh mi jrăng so dơi dơn pơp khôm Bap ŏh mi di gŭk tŏng trôk.",
  "2": "Hư̆n yơh, jăng jai ŏh mi phă gai, man ô̆h kei ta măt tơm, ndrơm băl pra mhŏ găl khăng mhŏ mŏng hih bư̆n jêh iên ta truông ram, no di nêh dơ-dêh nơ-nei. Ăñ ngơi ngăn ta ŏh mi, hên jêh dơn pơp khôm ta hên ru.",
  "3": "Bê̆ dăh jăng jai ŏh mi phă gai, man ăn ti kêu gư̆t bruă ti ma jăng jai mhŏ,",
  "4": "no di pơp phă gai ŏh mi di so nai dơi so. Jêh iên, Bap ŏh mi di, Mtao khăng so mŏng tŭk ndăp jrăng khôm ta ŏh mi.",
  "5": "Jăng jai ŏh mi kuôl dăn, man mhŏ klăh di băl pra mhŏ găl, yơng hên khơñ dŏk kuôl dăn mŏng hih ƀư̆n jêh iên ta kêng truông, no di ăn nai so, Ăñ ngơi ngăn ta ŏh mi, hên jêh dơn pơp khôm ta hên ru.",
  "6": "Ƀê̆ dăh, tĭng ju ŏh mi, jăng jai kuôl dăn, ăn mư̆t mŏng dŭ lăm ŏh mi di jêh iên čăng lat ƀăng jêh hư̆n kuôl dăn ta Bap. Mtao khăng mau măt mŏng tŭk ndăp. Jêh hư̆n Bap ŏh mi di, Mtao khăng so mŏng tŭk ndăp jrăng khôm ta ŏh mi.",
  "7": "Jăng jai ŏh mi kuôl dăn, man ngơi lư̆k lư̆k năn pơp so yuôm, ndrơm băl uôn lan dơ-dêh khăng mhŏ, yơng hên mĭn mơn pơp ngơi ŏk Yang jrăng iêt pơp kuôl dăn.",
  "8": "Hư̆n yơh, man mhŏ ndrơm klăh hên. Bơ yơng Bap ŏh mi di gư̆t pơp ŏh mi khơñ luôr ta ŏh mi dăn ta Khua Yang.",
  "9": "Kơt iên, ăn ŏh mi kuôl dăn klăh iêu: “Wơ Bap hi gŭk tŏng trôk, ăn năn Bap mau pơp nơ-nei ƀrăh ngôr.\"",
  "10": "Dăn čar Khua Yang trôh, dăn pơp Khua Yang khơñ dơi ñjêng mŏng teh dih ndrơm tŏng trôk.",
  "11": "Dăn ăn ta hi nar o pơp sông sa grăp nar.",
  "12": "Dăn đač un pơp tih hi, ndrơm hi jêh đač un ta nêh tơm lăm tih ta hi.",
  "13": "\tEi ru ndơp hi mŏng pơp mblơm, ƀê̆ dăh dăn tŏng tlĕh hi băh yang djŏh.",
  "14": "Ndă di ŏh mi đač un pơp tih ta nêh dơ-dêh, Bap ŏh mi tŏng trôk ăt jrăng đač un ta ŏh mi ya.",
  "15": "Ƀê̆ dăh, ndă ŏh mi so đač un ta pơp tih nêh dơ-dêh, Bap ŏh mi ăt so đač ta pơp tih ŏh mi ya.",
  "16": "Jăng jai ŏh mi ngăl sa, man ƀlang môh măt ênguôt ndrơm băl pra mhŏ găl khăng mhŏ, bơ yơng hên khăng lăm ƀlang môh măt huôñ ro no di nai gư̆t năl hên ngăl sa. Ăñ ngơi ngăn ta ŏh mi, hên jêh dơn pơp khôm hên di ru.",
  "17": "Ƀê̆ dăh tĭng ju ŏh mi, jăng jai ŏh mi ngăl sa, ăn ñŏh dak ƀau kăh tŏng bôk jêh iên tuih măt.",
  "18": "No di so ƀlang ta nêh dơ-dêh gư̆t jăng jai ŏh mi ngăl sa, ƀê̆ dăh ăn ƀlang ta Bap, Mtao mau măt mŏng tŭk ndăp, jêh iên Bap ŏh mi, Mtao so mŏng tŭk ndăp, jrăng khôm ta ŏh mi.",
  "19": "Man thêm ñăt ta tơm pơp yuôm tŏng dôn teh, tŭk mau te-rĕh, bring sa lăm rai, jêh iên mau băl tlĕ mư̆t muôč sŏk dăp.",
  "20": "Mlih tŭk hư̆n, ăn ñăt thêm ta tơm pơp yuôm tŏng trôk, tŭk so mau te-rĕh mdăh bring lăm rai, jêh iên ta tŭk băl blăč so dơi mư̆t mdăh sŏk dăp.",
  "21": "Bơ yơng u tŭk ngăn drăp ŏh mi gŭk, nuih nhăm ŏh mi ăt jrăng gŭk ta iên ya.",
  "22": "Kuôn măt jêng iñ kđen ta săk jăn. Hư̆n yơh, ndă di măt ŏh mi găl, lĕ mơt săk jăn ŏh mi jrăng bêng ta pơp ang.",
  "23": "Ƀê̆ dăh ndă măt ŏh mi djŏh, lĕ mơt săk jăn ŏh mi bêng pơp ngo măng. Kơt iên, ndă pơp ang mŏng ŏh mi hôm jêng ngo măng, pơp ngo măng hư̆n jêng kjham ngĭn ngăn!",
  "24": "So mau nêh dơi mhŏ bruă ta bar nau khua, yơng nêh hư̆n jrăng hao nuih ta khua ho jêh iên khăp ta khua tŏ, mdăh ndeh kriêng ta khua ho jêh iên mưč mač ta khua tŏ. Ŏh mi so dơi mhŏ bruă Yang Trôk wăt ta ngăn drăp.",
  "25": "Hư̆n yơh, ăñ ngơi ta ŏh mi blăh iêu man rŭng răng ta pơp brêh tơm, blăh di năn pơp băn jrăng sa, mdăh năn pơp băn jrăng ñêt, blăh di mŏng săk jăn tơm năn pơp jrăng čư̆t sŏh. Geh ya! Pơp brêh yuôm hĭn ta pơp sa, jêh iên săk jăn yuôm hĭn pơp čư̆t sŏh?",
  "26": "Ăn dlăng nư̆k pôl sư̆m tŏng trôk. Ĕh so tuôm răh mdăh riêk, ăt so tuôm ñăt thêm mŏng năm, ƀê̆ dăh Bap ŏh mi di tŏng trôk ăt ruông ĕh. Ŏh mi so yuôm hĭn ta sư̆m lah?",
  "27": "Mau mơh nêh mŏng ŏh mi mơn băh pơp rŭng răng dơi lăm yau ƀê̆ pơp brêh tơm dŏng nê̆ ya?",
  "28": "Pơp mhŏ ŏh mi rŭng răng ta čhum ao? Ăn ŏh mi mĭn ta kao diêm bri mŏng lŏ, dlăng ĕh đô̆ nă čăt jêng. Ĕh so mhŏ bruă, ĕh ăt so ri brai.",
  "29": "Ƀê̆ dăh ăñ ngơi no di ŏh mi gư̆t, khă mtao Salômôn ta lĕ mơt pơp drưh ang kăn di ăt so dơi sŏh ao nhăp blăh di ju mlăm kao diêm bri mŏng lŏ hư̆n.",
  "30": "Wơ băl ƀê̆ pơp đăo hư̆n, ndă Yang Trôk lăm sŏh ta kao mŏng lŏ, jêng pơp nar o hôm, tŏng o nai čĕ mŏng war iñ klăh iên, so Yang Trôk lăm sŏh ta ŏh mi pơp nhăp găl ŏk hĭn ta iên lah?  ",
  "31": "Hư̆n yơh, man rŭng răng jêh iên ngơi: \"Năn pơp băn jrăng sa ho? Năn pơp băn jrăng ñêt ho? Mdăh năn pơp băn jrăng sŏh ho?",
  "32": "Yơng uôn lan dơ-dêh ăt khăng juôi pơp ho. Bơ yơng Bap tŏng trôk ŏh mi di gư̆t khăñ ŏh mi khơñ mau lĕ mơt pơp hư̆n.",
  "33": "Ƀê̆ dăh luôr ngăn ăn sak juôi Uôn Yang Trôk ta pơp kpă Yang Trôk di, jêh iên lĕ mơt pơp hư̆n jrăng dơi ăn ta ŏh mi.",
  "34": "Kơt iên, man rŭng răng ta nar tŏng o, yơng nar tŏng o jrăng mĭn ta nar tŏng o. Grăp nar mâo djăp pơp dlĕh knap ta nar hư̆n ru."
}