mnong_2020_mng_mlt_mat_book/mat/15.json

{
  "1": "\tMông hân, băl Pharisi jêh iên khoa t'ti pơp bhiên băh Yêrusalem tŏng  tuôm ta Yang Yêsu. Hên ngơi:",
  "2": "\t\"Pơp mhŏ băl ƀing kna me, hên wêh mgao ta pơp t'ti băh pang yo lak. Bơ yơng hên so rao ti luôr ta hên sông.\"",
  "3": "\tKhoa Yang ngơi ta hên: \"Mă pu me! Pơp mhŏ yơng băh pơp t'ti hân pu me mhŏ mgao pơp bhiên Yang Trôk di?\"",
  "4": "\tBơ yơng Yang Trôk jêh t'ti lăh: \"Ăn mpŭ ta mei bap me di, jêh iên nêh tơm păh rak mei mdăh bap jrăng lăm khât.\"",
  "5": "Bê̆ dăh pu me wêh t'ti: \"Nêh tơm ngơi ta mei mdăh bap klăh iêu; lĕ mơt pơp gĕh đru mei bap jêh ăñ myơr ta Yang Trôk ru.\"",
  "6": "\tNêh hân so hôm wêh mhŏ broă kăh tôr ta mei bap kăn. Ndă iên, pu me jêh ndrŏh pơp Yang Trôk yơng băh pơp t'ti găl pu me tơm.",
  "7": "Wơ băl pra mhŏ găl! Ê sai jêh têh luôr gĕh ngăn ta pu me jăng jai ngơi klăh iêu:",
  "8": "\t\"Uôn lan ho mpŭ n'nei ta ăñ čuôm gu ta băr yuôi, bê̆ dăh mŏng nuih nhăm hên wăč băh ăñ ngăn.\"",
  "9": "Hên kôh mpŭ ta ăñ jêng dăh dan, bơ yơng pơp bhiên hên t'ti jêng pơp bhiên kuôn nêh di.",
  "10": "\tJêh hân Khoa Yang kuôl băl uôn lan trôh jêh iên ngơi ta hên: \"Ăn iêt jêh iên wơng.\"",
  "11": "\tSo mâo ju mta pơp băh ling mât mŏng dơk dơi lăm ƀơ̆ nêh. Ƀê̆ dăh năn pơp ĕh lôh băh dơk pơp hân jêng lăm ƀơ̆ nêh.  ",
  "12": "\tMông hân, băl ƀing kna trôh ngơi ta Yang Yêsu: \"Khoa Yang gât ya băl Pharisi hao nuih bơ yơng tŏng pơp Khoa Yang ngơi klăh iên?\"",
  "13": "\tYang Yêsu ngơi klăh iêu: \"Năn jhi Bap ăñ tŏng trôk so tăm nai jrăng dŏk lĕ mơt.\"",
  "14": "\tLơi hui si hên, hên jêng nêh lăm truông tiêh măt. Ndă nêh tiêh lăm truông nêh tiêh, lĕ bar jrăng lăč mŏng ƀăng.",
  "15": "\tPêtrôs ngơi ta Khoa Yang: \"Dăn l'lang ta hi pơp h'hôr hân.\"",
  "16": "\tYang Yêsu ngơi: \"Oh mi ñăm dơi wơng lăh?\"",
  "17": "Oh mi ñăm dơi so lăh! Grăp mta pơp lăm mât mŏng dơk ĕh jrăng jâr ta khŭng jêh iên jrăng sak tôh mŏng hih djăh!",
  "18": "Ƀê̆ dăh lĕ mơt pơp lôh băh dơk ĕh biă băh nuih nhăm. Ĕh jêng pơp lăm ƀơ̆ nai.",
  "19": "\tBơ yơng dŏng băh nuih nhăm dơi lăm ñjêng pơp mĭn ƀai, lăm khât nêh, dŏng târ, čhơng tăt, tlĕ blăč, têh huôk jêh iên hêr mưc̆.",
  "20": "Hân jêng lĕ mơt pơp lăm ƀơ̆ nêh. Ƀê̆ dăh sông ñăm rao ti so lăm ƀơ̆ nêh ôh.",
  "21": "Jêh hân Yang Yêsu du băh iên sak mât mŏng wăl uôn Tirơ jêh iên Siđôn.",
  "22": "\tTŏ hân, mâo ju nâo nêh u'ur Ka-na-an mŏng wăl hân trôh. De ôr tĕh dơk dăn: \"Wơ Khoa Yang, Kuôn mtao Đavit, dăn đač un ăñ! Kuôn u'ur ăñ yang djŏh mât knap mñai ngăn.\"",
  "23": "\tɃê̆ dăh Yang Yêsu so ngơi ta de ju mta pơp ôh. Băl ƀing kna trôh dăn ta Khoa Yang klăh iêu: \"Dăn Khoa Yang lăh ăn de du, yơng de răn ƀăn ôr dăn ta kơi băn.\"",
  "24": "Ƀê̆ dăh Yang Yêsu ngơi: \"Ăñ dơi sak trôh yơng băh pôl biêp suô̆ nga băl Israel gu.\"",
  "25": "\tɃê̆ dăh de sak čuôn krŭng ta măt Khoa Yang, de dăn: \"Wơ Khoa Yang, dăn đru ăñ ƀă.\"",
  "26": "Khoa Yang ngơi: \"So gĕh ƀă ndă sŏk ƀăñ oh kuôn di jêh iên čĕ ta kuôn sâo.\"",
  "27": "\tDe ngơi: \"Gĕh ngăn ya! Wơ Khoa Yang, ƀê̆ dăh pŏng ĕh kuôn sâo ăt dơi sa ƀăñ djăh băh jhưng khoa lăč mŏng so ya.\"",
  "28": "Hân yơh, Yang Yêsu ngơi ta de: \"Wơ rôh! Pơp đăo e di ram ngăn! Broă jrăng jêng ta e, hui si pơp e khơñ.\" Kuôn u'ur de dơi băh trĭp ta mông hân.",
  "29": "\tYang Yêsu du băh tŭk hân sak trôh mơñ dak sĭ Galilê. Jêh hân, Khoa Yang čơng ju mlăm yôk jêh iên gŭk ta iên.",
  "30": "\tMâo băl uôn lan ŏk sak trôh ta Khoa Yang. Hên triêu băk nêh kuet, nêh tiêh, nêh wiên, nêh mblo, wăt ta ŏk nêh kuôp ji d'dêh. Hên ndơp lĕ băl hân ta jŏng Khoa Yang Yêsu jêh iên Khoa Yang lăm băh ta hên.",
  "31": "\tHân yơh băl uôn lan hơ̆ hă ngăn jăng jai hên so nêh mblo dơi ngơi, nêh kuôp ji dơi băh, nêh kuet dơi sak jêh iên nêh tiêh dơi so. Hên n'nei ta Yang Trôk băl Israel di.",
  "32": "\tYang Yêsu kuôl băl ƀing kna jêh iên ngơi: \"Ăñ tŏng đač băl uôn lan ŏk ho, bơ yơng hên jêh gŭk băk ăñ pei nar ru ƀê̆ dăh so mâo pơp sa. Ăñ so khơñ ăn hên du jăng jai hên ñăm dơi sông. Ơn dăh hên jrăng nguôt wiên mŏng mbar truông.\"",
  "33": "\tBăl ƀing kna wêh ngơi ta Khoa Yang: \"U ta tŭk hi dơi juôi ŏk ƀăñ ta tŭk tač ndrăñ ho, no di dơi ăn ta uôn lan ŏk klăh tŏ hân?\"",
  "34": "\tYang Yêsu lup hên: \"Oh mi dơi mâo ŏk mlăm ƀăñ?\" Hên ngơi: \"Pŏh mlăm jêh iên mâo ƀê̆ ka.\"",
  "35": "\tHân yơh, Khoa Yang Yêsu t'tă ta uôn lan gŭk mŏng sô̆.",
  "36": "Khoa Yang ñôt pŏh mlăm ƀăñ jêh iên mâo ƀê̆ ka, jêh lăh găl, Khoa Yang phĭč ƀăñ jao ta băl ƀing kna. Băl ƀing kna sak phă ta băl uôn lan.",
  "37": "\tGrăp nâo nêh dơi sa jêh iên dơi hơm. Hên dôñ lĕ mơt ƀăñ djăh sa ăt hôm khăñ pŏh bai bêng.",
  "38": "\tLĕ mơt nêh sa mâo puôn bâo nâo t'tlâo, so ngơp băl u'ur jêh iên ku sei.",
  "39": "\tJêh hân Yang Yêsu ăn uôn lan du hih jêh iên hao mŏng plŭng sak găn wăl Magađan."
}