mnong_2020_mng_mlt_mat_book/mat/28.json

{
  "1": "Ta kơi nar saƀat, ôi măng nar tal muôi bôk simen, Mari Mađơlen jêh iên Mari dêh sak siêp tu môč.",
  "2": "Tŏ hư̆n, mau pơp nggơ-nggăr teh ktang ngăn, bơ yơng ju nau nêh myang Yang di jư̆r băh trôk, sak jêh iên lơng bôk mau, jêh hư̆n gŭk ta iên.",
  "3": "Săk jăn nêh myang ndrơm klăh di ƀlĭp lơp, jêh iên ao buôk klăh di pliêr.",
  "4": "Băl ka han gak pơ prăm bơ yơng bhŭng tăl ĕh bông ndrơm klăh di nêh khư̆t.",
  "5": "Ƀê̆ dăh nêh myang ngơi ta hên: \"Man bhŭng, bơ yơng ăñ gư̆t pu e juôi Yêsu, Mtao jêh nai pŏng điñ.",
  "6": "Khua Yang so hôm gŭk ta o ƀă, ƀê̆ dăh jêh dŏk brêh ru, hui si pơp Khua Yang jêh ngơi. Ăn sak dlăng tŭk Khua Yang bê̆.",
  "7": "Ăn sak têh sơm gơñ ta băl ƀing kna Yang klăh iêu: \"Khua Yang jêh dŏk brêh băh tŭk khư̆t. Tŏ hư̆n, Khua Yang jrăng sak luôr ta pu me trôh ta Galilê. Ta iên, pu me jrăng so Khua Yang. Dlăng ho! Ăñ jêh têh ta pu e ru hư̆n.\"",
  "8": "Băl u ur mhăč mhôr du băh tu, wăt pơp bhŭng, tư̆n ta pơp čhô̆ brơn jêh iên dhul sak têh ta băl ƀing kna Khua Yang.",
  "9": "Tŏ hư̆n, Khua Yang tŏng tuôm ta hên, jêh iên ngơi: \"Đăp nang ta pu e\" Băl u ur sak mơñ, ut jŏng Khua Yang jêh iên kôh mpŭ ta Khua Yang.",
  "10": "Jêh hư̆n Yang Yêsu ngơi ta hên: \"Man bhŭng, ăn sak têh ta ŏh mi ăñ trôh ta Galilê. Ta iên hên jrăng tŏng tuôm ăñ.\"",
  "11": "Jăng jai băl u ur hư̆n sak. Tŏ hư̆n, băl ka han gak tu mư̆t mŏng uôn ram têh sơm ta băl khua mhŏ yang ram lĕ mơt bruă jêh trôh.",
  "12": "Jêh tŏng ƀư̆n ta băl khua u rañ jêh iên trông čhai ta bruă hư̆n, hên ăn ŏk prăk ta băl ka han",
  "13": "jêh iên tơ-tă, Ăn pu me ngơi: \"Băl ƀing kna kăn trôh mông mơ-măng jêh iên sŏk blăc̆ săk khư̆t mông hi jăng jai bê̆.\"",
  "14": "Ndă pơp ho trôh ta tôr khua čar, hi jrăng lơ lang ta kăn jêh iên mgang pu me so tuôm pơp dlĕh.\"",
  "15": "Hư̆n yơh jêng băl ka han sŏk prăk jêh hư̆n mhŏ drơm klăh di băl ĕh tơ-tă. Pơp ho nai lăm pĕh lĕ mơt mŏng uôn lan YoThaĭ jêh iên tăl hôm trôh nar o ya.",
  "16": "Ƀê̆ dăh măt muôi nau băl ƀing kna sak trôh ta Galilê, trôh ta yôk Yang Yêsu jêh tơ-to ta hên.",
  "17": "\tJăng jai hên so Khoa Yang hên kôh mpŭ ta Khoa Yang, ƀê̆ dăh mâo ƀơ-ƀă nêh hôm đing.",
  "18": "\tYang Yêsu sak trôh jêh iên ngơi ta hên: \"Lĕ pơp myang tŏng trôk jêh iên mŏng tĕh jêh jao ta ăn.",
  "19": "\tHân yơh, ăn sak jêh iên tơ-ti lĕ mơt uôn lan ñjêng ƀing kna ăñ ji. Ăn mhŏ ƀap tem ta hên ta năn Yang Bap, Yang Kuôn jêh iên Yang Ngăt Găl.",
  "20": "\tĂn tơ-ti hên ñôt kjăp lĕ mơt pơp ăñ jêh tơ-tă ta pu me. Jêh iên ho! Ăñ ăt gŭk ju băk ta pu me, răn ƀăn tăl trôh nar tôč dât."
}